कहाँ है मृत्यु : मेरी आवाज़ में

मेरे नाती गोविन्द की बहुत जिद थी कि मेरी आवाज़ में मेरी कोई रचना रिकॉर्ड हो और इन्टरनेट के माध्यम से पूरी दुनिया के लिए उपलब्ध हो.
उसकी मेहनत और आपके लगाव का नतीजा है मेरा यह पहला प्रयास.
आपके प्रतिक्रियाओं का आकांक्षी : धनेन्द्र प्रवाही

यू-ट्यूब पर देखने के लिए यहाँ क्लिक करें

चल रे टमटम

चल रे टमटम 

साइठ बछर लंबा डहर 

कय कोस

नी जानोंन 

जानोन 

साइठ बछर लम्बा डहर 

दू बछर कर छऊआ 

बाप हर बिगे खोजे 

मांय कर अंचरा में 

का करो मांय 

मांग कर लाल बिछरत हे 

कोइख कर लाल पिछरत हे 

झेन्झरो अंचरा मांय कर 

सेकरे छाईह तर 

रउद अंधड़ 

बरखा झईर 

किटी किटी पाला 

बीत गेलक कोनो रंग 

सतरह गो जेठ 

सतरह गो हथिया 

ओतने पूस 

कान्हो हेराल रहे फागुन 

जोताय गेलक टमटम में 

नावां बछेड़ा 

कतना सवार 

कतना असबाब 

देहाती संडक 

गाडी कर रोबाब 

जवानी कर शान 

चाइल 

करे लाग्लक गान 

चल रे टमटम 

चल चल चल 

धइन देह आइज ले 

राखले तो मान 

एहे रंग संग देह 

नझो जात प्राण 

ले पार तो लगाम फेइर 

काइल होत  बिहान

ख़ुशी मने कईर पार  तो 

फेइर प्रयाण गान 

चल रे टमटम 

चल चल चल 

 

  [अगम बेस: page no. 36 . नागपुरी काव्य संग्रह] 

परकाला

कईसन  सुन्दर रहे

हाथ में परकाला 

चेहरा के संगे संग 

लील अकास 

हरियर धरती 

सघन बन 

झरना नदी 

खान खदान 

फैक्ट्री मनक चिमनी मन 

रीझे रीझे हूलकत रहयं 

कतई कतई बात कान में

 कहत रहयं

लोभावान 

सोहावन 

मनभावन 

***

का रंग गिर गेलक 

कईसन दरईक गेलक 

मुंहक छवी छितिछान 

संगे धरती आसमान 

छाकछुन भे गेलक 

भेन्सुवावान 

डरडरावन 

मनतोरन

[चोरेया , 2005 पृष्ठ ३२ अगम बेस ]   

ग़ज़ल

पछिमे से का आलक हावा 

घरे आब बाज़ार भे गेलक।

मोल -तोल  हय डेग -डेग  में 

रिसता कार-बार भे गेलक।

दारु किडनैप लंगापन तो 

युग कर संसकार भे गेलक।

बुढ़वा घर कर होल संतरी 

छौंड़ा तो फरार भे गेलक।

आइग लागलक का बन में 

चन्दन तक अंगार भे गेलक।

              [अगम बेस: page no. 65. नागपुरी काव्य संग्रह] 

कहाँ हय मिरत !!!

कहाँ हय मिरत !!!

ई मउराल फूल!

मोइर गेलक का?
एहे तो खिलल रहे
रीझे- रीझे हावा संगे
झुमत रहे डाइर में
एहे तो बांटत रहे
दसो दिसा में
रूप -रंग -गंध कर सन्देश
आब जीउ छोइड देलक का ?
से लेगिन झरतहे !


इकरे जइर  तरे
झरल फुलकर  ओदा माइंद
फुनगी तक बुदा में
अमरित रस भरत हे
नावां कलि के आइंख ओगल
गते गते उघरत हे !

हेठे जीयत  माइंद  गुम-सुम
उपरे मह- मह फूल
तरे -उपरे
उपरे -तरे
जिनगी कर रसवंती
धारा अटूट
भीतरे -भीतर
कले -कल
लुक्ले-लुकल बहत हे!

माइंद में जीउ रस
खिलल फूल में जिनगी
कहाँ केजन मिरतू ह्य फूल में कि माइंद  में
कहूँ तो नइ दिसत हे !!


 [अगम बेस: page no. 35. नागपुरी काव्य संग्रह. nagpuri translation of his own Hindi poem 'फूल और खाद '] 

फूल मूल कर बात

से दिन कहे लागलक फूल जइर से 

'खाद में गड़ाल  हिस कोन तप कईर के ?'

धरती से जइर हँसलक , 'ना कर  ताव '

फिन तो हिंये आबे अइत ना अगराव।

काँइप उठलक डर  के मारे फूल  थर थर 

झइर गेलयं तखने कतइ पाँख झर झर 

छाती लगाय कहलक जइर ठिनक भुइयाँ 

'रूप -रस -गंध  के हय खान एदे हिंयां।।

 [अगम बेस: page no. 68. नागपुरी काव्य संग्रह] 

कवर पेज :अगम बेस, नागपुरी काव्य संग्रह

बोध

तोर सपना सच ना होलक।
उ सपने रहे
से आइन्ख से रहे बड़
टूटबे  करतलक
टुईट  गेलक.

ना बह लोर
तोयं आपन  घर के ना छोड़
बाहरे हेराय जाबे
बाला अगम तातल हय
गरीब कर जिनगी तइर
छान के छनइक जाबे

एक तो आँख अपने सुकुवार
सेकर देखल सपना
आउरो सुकुवार
उकरो ले सुकुवार
आँइखक लोर

सुन,
दरइक गेलक सपना
तो ना ढरक
ना बरिस
तोंय आँइखे में रह
तोके
और कहाँ मिली  ठौर

तोर लेगिन गीता कर उपदेश
सुख-दुःख लाभ -हाइन के
बरोबइर बुइझ-जाईन के
ज्ञानी होय के रह

नइ  मिललक सुख
नइ हांसले
नइ गाले
दुःख तो पाले नि पूरा.
इकर से नइ हारबे
इकर से नइ हेराबे
तो स्थितप्रज्ञ होय जाबे
अरे भाइ
आधा तो अधे सही.

 
[अगम बेस: page no. 28. नागपुरी काव्य संग्रह]